"Practice makes perfect"
“မနောက်ပါနဲ့ဦးလေးရာ” “မနောက်ပါဘူး ငါ့တူရာ” တကယ်ပြောတာပါ။ တိုးတက်ချင်ရင် လေ့ကျင့်ပါ။ များများတိုးတက်ချင်ရင် များများလေ့ကျင့်ပါ။ တစ်ခုပဲရှိတယ် လေ့ကျင့်တယ်ဆိုတဲ့နေရာမှာ နည်းမှန်လမ်းမှန်မဟုတ်ရင်၊ သို့မဟုတ် ဖြတ်လမ်းမသိရင် ဆရာ မပြရင် ငါးပိဖုတ်တောင် နည်းမကျ ဆိုသလို တိုးတက်မှုနှေးကွေးနိုင်တယ်။ ထိရောက်မြန်ဆန်တဲ့ နည်းလမ်းတွေ သိထားရင်တော့ ပိုပြီးခရီးရောက်နိုင်တာပေါ့ဗျာ။
ဓါတ်ပုံပညာလေ့လာနေကြတဲ့ သူငယ်ချင်းတွေအတွက် ကျနော်သိထားသလောက်၊ ဖတ်မှတ်လေ့လာထားသလောက် ထိရောက်မယ့်နည်းလမ်းလေးတွေကို ဝေမျှပေးချင်ပါတယ်။
1. Learn the Basics
ဘယ်ဟာမဆို အောက်ခြေကစရမှာပါ။ ရေတွင်းတူးတာက လွဲလို့ပေါ့လေ။ ဓါတ်ပုံပညာအခြေခံတွေကို သိအောင်လေ့လာပါ။ Exposure ဆိုတာဘာလဲ။ Aperture, ISO နဲ့ Shutter speed တွေက exposure ပေါ်မှာ ဘယ်လိုသက်ရောက်မှုတွေ ရှိလဲ။ F-stop ဆိုတာဘာလဲ။ ကင်မရာတစ်လုံး ရဲ့ အလုပ်လုပ်ပုံ အခြေခံကဘာလဲ စတာတွေကို လေ့လာပါ။ ကင်မရာလက်ထဲရောက်လာလို့ မျက်စိထဲ လှတယ်ထင်တာတွေ လျှောက်ရိုက်ပေမယ့် ပုံကောင်းထွက်လာဖို့ ခဲယဉ်းပါတယ်။ ကင်မရာကမြင်တာနဲ့ မျက်စိကမြင်တာ ဘယ်လိုကွာခြားမှုတွေရှိတယ်ဆိုတာ သိထားဖို့လိုပါတယ်။ ဒီအခြေခံတွေကို လေ့လာနိုင်တဲ့ websites တွေ အများကြီးရှိပါတယ်။ အဲဒီထဲက တစ်ခုကို အောက်မှာ လင့်ပေးထားပါတယ်။ အင်္ဂလိပ်စာ အားနည်းတဲ့ သူငယ်ချင်းတွေအတွက် အဲလိုအခြေခံလေးတွေကို ဘာသာပြန်ပြီး ပို့စ်လေးတွေ တင်ပေးဖို့တော့ စိတ်ကူးထားတယ်ဗျာ။
https://photographylife.com/what-is-aperture-in-photography
ဒီလင့်က Understanding Aperture - A Beginner's Guide ပါ။ aperture အကြောင်း၊ DoF လို့ခေါ်တဲ့ Depth of Field အကြောင်းတွေ ရှုင်းပြထားပါတယ်။ အဲဒီကမှ တခြား Shutter, ISO အကြောင်းတွေ စပ်ဆက်လေ့လာနိုင်ပါတယ်။
2. Get to Know Your Camera
ကိုယ့်ရဲ့ ကင်မရာဟာ ဘာတွေလုပ်နိုင်သလဲ၊ ဘယ်လောက်လုပ်နိုင်သလဲ၊ ဘယ်လို control လုပ်ရမလဲဆိုတာတွေ သိအောင်လေ့လာပါ။ မဟုတ်ရင်တော့ မျောက်အုံးသီးရသလိုပဲ နေမှာ။ အရေးကြီးတဲ့ အချိန်မှာ Aperture/Shutter speed dial ကို ဘယ်ညာ လှည့်မှားနေတာ။ Metering mode ပြောင်းဖို့ menu ထဲမှာလိုက်ရှာနေရတာ၊ ISO ဘယ်မှာပြောင်းရမှန်းမသိတာ စတာတွေနဲ့ ပုံကောင်းတစ်ပုံရနိုင်တဲ့ အခွင့်အရေး ဆုံးရှုံးသွားနိုင်ပါတယ် (မယုံမရှိနဲ့ ကိုယ်တွေ့)။ အဲဒါကြောင့် ကိုယ့်ကင်မရာအကြောင်း အူမချေးခါးမကျန် မသိတောင်မှ တော်တော်များများတော့ သိထားသင့်တာပေါ့။ အကောင်းဆုံးက ကင်မရာနဲ့အတူပါလာတဲ့ Manual ကိုဖတ်ပါ။ ကင်မရာဝယ်တုံးက မပါလာလဲ အင်တာနက်မှာ အလကားဒေါင်းလို့ရပါတယ်။ ဒေါင်းဖို့အခက်အခဲရှိရင် comment section မှာကင်မရာ Model ပေးခဲ့ပါ။ ဒေါင်းပြီး email ပို့ပေးပါ့မယ်။ စာဖတ်မပျင်းပါနဲ့။ ကိုယ့်ကိုယ်ကို သိလှပြီလို့လဲ ဘယ်တော့မှ မထင်ပါနဲ့။ Manual ထဲမှာ ကိုယ်မသိတာတွေ အများကြီးရှိနိုင်ပါသေးတယ်။ Manual ကိုကျေညက်သွားရင်တော့ အုံးသီးကနေ ငှက်ပျောသီးဖြစ်သွားပြီပေါ့။
3. Take Your Camera Everywhere
ဖြစ်နိုင်ရင် ခင်မာလာကို မျက်စေ့အောက်က အပျောက်မခံပါနဲ့။ သွားလေရာမှာ ကင်မရာပါပါစေ။ ကင်မရာလက်ထဲရှိနေရင် ရွစိရွစိနဲ့ ဟိုဟာရိုက်ချင် ဒီဟာရိုက်ချင်ဖြစ်တာပေါ့ဗျာ။ ပထမတော့ point and shoot အဆင့်ပေါ့။ အဲဒီကနေ တဆင့်တက်လာရင် ကိုယ့်ပတ်ဝန်းကျင်မှာရှိတဲ့ အရာတွေကို ပိုပြီး ဂရုစိုက်တက်လာမယ်။ မြင်တက်လာမယ်။ ဘယ်ဟာလေးကို ဘယ်လိုရိုက်လိုက်ရင် ပုံကောင်းလေးဖြစ်နိုင်တယ် ဆိုတဲ့ စိတ်ကူးစိတ်သန်းလေးတွေ ပိုပြီးရင့်ကျက်လာမယ်။ ကင်မရာမပါတောင်မှ စိတ်ကူးထဲမှာ ရိုက်ကြည့်တက်အောင် ကြိုးစားပြီးအကျင့်လုပ်ပါ။တကယ်အကျိုးရှိပါလိမ့်မယ်။
4. Learn from the Masters
ဓါတ်ပုံဂရုကြီးတွေဆီက ရနိုင်သလောက် လေ့လာသင်ယူပါ။ လူကိုယ်တိုင်သွားပြီး တပည့်ခံရမယ်လို့တော့ မဆိုလိုပါဘူး။ ဖြစ်နိုင်ရင်တော့ ကောင်းသပေါ့ဗျာ။ ဒါပေမယ့် ဘယ်လိုမှ Ansel Adams ရဲ့တပည့်တော့ မဖြစ်နိုင်တော့ဘူးမလား။ သူတို့ရဲ့ပုံတွေက ဘာကြောင့် ဒီလောက်ကောင်းနေသလဲ၊ composition အယူအဆတွေ၊ အလင်းအမှောင် အယူအဆတွေ လေ့လာနိုင်ပါတယ်။ ပြီးတော့ စုတုပြု လုပ်ရမှာပေါ့။ ဂရုကြီးတွေလို့ အများက လက်ခံထားကြတဲ့ ဆရာ့ဆရာကြီးတချို့နဲ့ နာမည်ကျော် ဓါတ်ဆရာတချို့အကြောင်းကို လေ့လာနိုင်အောင် link လေးတွေ အောက်မှာပေးထားပါတယ်။
Ansel Adams
Alfred Stieglitz
Henry Cartier-Bresson
Eve Arnold
Tim Hetherington
Zack Arias
Yousuf Karsh
5. Projects, projects, porjects
Project တွေလုပ်ပါ။ project တစ်ခုပြီးမြောက်အောင်မြင်ဖို့ဆိုတာ စိတ်ရှည်ဇွဲသန်ဖို့လိုပါတယ်။ project အဆုံးမှာ တိုးတက်မှုတစ်ခုတော့ အနည်းဆုံးရှိမှာပါ။ Project ဆိုတာဘာလဲ၊ ဘယ်လိုလုပ်ရမလဲ မသိသေးတဲ့ သူငယ်ချင်းတွေအတွက် idea လေးတွေရအောင် ထင်ရှားတဲ့ project အချို့ကို ဖော်ပြပေးပါ့မယ်။
365 or Project 365 - ဓါတ်ပုံသမားတိုင်းလိုလို ကြိုးစားကြတဲ့ project ပါ။ ရည်မှန်းချက်က ရှင်းပါတယ်။ တစ်နေ့ကို ဓါတ်ပုံတစ်ပုံနှုံးနဲ့ တစ်နှစ်စာ ၃၆၅ ပုံရိုက်ပါမယ်လို့ ပြောတာပါ။ တစ်နေ့တစ်ပုံရိုက်ဖို့ဆိုတာ လွယ်လွန်းတယ် မထင်ပါနဲ့။ အချိန်ကြာလာတာနဲ့အမျှ ကင်မရာမကိုင်ဖြစ်တဲ့နေ့တွေ ရှိလာမှာ ကျိန်းသေပေါက်ပါ။ အဲဒီအခါမျိုးမှာ ငါ့မှ ဒီပရောဂျက်ရှိနေတယ်၊ ဖြစ်အောင်လုပ်ရမယ်ဆိုတဲ့ commitment ရှိမှသာ အောင်မြင်ပြီးဆုံးနိုင်မှာပါ။
Project 52 or 52 Weeks - ဒါကတော့ 365 ထက်နည်းနည်းပို သက်သာတဲ့ ပရောဂျက်ပါ။ တစ်ပတ်ကို တစ်ပုံ၊ တစ်နှစ် 52 ပတ်၊ 52 ပုံ ရိုက်ရမှာပါ။
100 Strangers - ဒါကတော့ အထူးသဖြင့် Street photographer တွေအတွက်ပါ။ ကိုယ်မသိတဲ့ လမ်းပေါ်က လူစိမ်း အယောက် ၁၀၀ ရဲ့ပုံတွေကို မှတ်တမ်းတင်ဖို့ပါ။ တစိမ်းတစ်ယောက်ကို ဓါတ်ပုံသွားရိုက်ဖို့ဆိုတာ ပေါ့သေးသေး စိမ်ခေါ်မှုမဟုတ်ပါဘူး။ အခန့်မသင့်ရင် အနည်းဆုံးတော့ အထိုးခံရနိုင်တယ် (မျက်စောင်း)။
Nifty Fifty - ဒါကတော့ ဓါတ်ဆရာအချင်းချင်းပဲသိတဲ့ အခေါ်အဝေါ်ပါ။ 50mm Lens ကိုပြောတာပါ။ 50mm Lens ဟာ လူ့မျက်စိနဲ့မြင်ရတဲ့ မြင်ကွင်းနဲ့ အနီးစပ်ဆုံးတူတယ်လို့ဆိုပါတယ်။ Crop frame camera အတွက်တော့ 35mm ဖြစ်ပါလိမ့်မယ်။ ဒီပရောဂျက်မှာတော့ 50mm Lens ကိုပဲသုံးပြီး အချိန်အတိုင်းအတာတစ်ခုအထိ ရိုက်ပါ့မယ်ပြောတာပါ။ ဥပမာ ၃လ၊ ၆လ စသဖြင့်ပေ့ါ။ တခြား Lens တွေပြောင်းမသုံးပဲ၊ အထူးသဖြင့် Zoom Lens တွေမသုံးပဲ Fixed focal length lens သို့မဟုတ် Prime Lens တွေပဲသုံးခြင်းအားဖြင့် composition skill ပိုကောင်းလာနိုင်ပါတယ်။ တနေရာထဲ အသေရပ်ပြီး Zoom လေး ထုတ်လိုက်သွင်းလိုက် လုပ်နေတာထက် ခြေထောက်ကို အသုံးပြု နေရာယူရတော့ ပိုပြီးမြင်တက်လာမှာပါ။ focal length အသေနဲ့ လိုချင်တဲ့အရာတွေပါဝင်လာအောင် angle အမျိုးမျိုးကနေ အနီးအဝေး ကြံဆပြီး ရိုက်တက်လာမယ်။ အင်မတန်အကျိုးရှိပါတယ်။
Self Portraits - ရိုက်စရာမရှိ ကိုယ့်ဘာသာကိုယ် ပြန်ရိုက်ဗျာ။ တကယ်ပြောတာပါ။ အချိန်တစ်ခုသတ်မှတ်ပြီးရိုက်မလား၊ ဥပမာ 365 project မှာ self portraits တွေချည့်ပဲ 365 ပုံရိုက်တာ။ ဒါမှမဟုတ် Self Portarits 100 ဆိုပြီး ပုံ ၁၀၀ ပြည့်အောင်ရိုက်တာပေါ့။ ကိုယ့်ပုံကိုယ်ရိုက်တာပဲ လွယ်တယ်မထင်ပါနဲ့။ ပုံ ၂၀ လောက်ရိုက်ပြီးရင် ဘယ်လိုထပ်ရိုက်ရပါ့မလဲဆိုတာ တကယ်ခေါင်းစားစရာဖြစ်လာမှာပါ။ ကြိုးစားကြည့်ပေါ့ဗျာ။
Colors - ဥပမာ Red ဆိုပြီး ကာလာအနီရောင်တွေကို အသားပေးရိုက်တာမျိုး၊ စာတိုက်ပုံး၊ မီးသတ်ကား စသဖြင့်ပေါ့။ သို့ကလို ပရောဂျက်တွေ များစွာရှိပါတယ်။ ကိုယ့်ဘာသာကိုယ်လည်း တီထွင်ကြံဆနိုင်ပါတယ်။
အပိုင်း ၂ ကို ထပ်ရေးပါဦးမယ်။